Ra’iisul Wasaaraha Israa’iil, Benjamin Netanyahu, ayaa sheegay in ay soo baxayaan calaamado muujinaya in Hoggaamiyaha Sare ee Iiraan, Ali Khamenei, uu “maqan yahay” ama aanu muuqan.
Netanyahu ma uusan si cad u sharxin waxa uu ula jeedo hadalkan, taasoo sii kordhisay jahwareerka ku saabsan xaaladda dhabta ah ee hoggaamiyaha Iiraan.
Sawirro dayax-gacmeed oo ay heshay BBC Verify, laguna qaaday magaalada Tehran subaxnimadii maanta, ayaa muujinaya burbur weyn oo gaaray qayb ka mid ah xarunta loo yaqaan Leadership House, oo ah xafiiska rasmiga ah ee Khamenei ee caasimadda Iiraan.
Ilaa hadda, wax war ah lagama hayo Ali Khamenei maanta, mana jiro xaqiijin rasmi ah oo sheegaysa inuu nool yahay ama geeriyooday.
Wararkii ugu dambeeyay ee ku saabsan xaaladdiisa ayaa kasoo baxay wasiirka arrimaha dibadda Iiraan, Abbas Araghchi, oo wareysi uu siiyay NBC News ku sheegay in hoggaamiyaha sare uu “nool yahay” inta uu ogyahay.
Xaaladda ayaa weli ah mid aan caddayn, waxaana la filayaa in saacadaha ama maalmaha soo socda ay soo baxaan faahfaahin dheeraad ah.
Wixii warar cusub ah kala soco boggeena.
